salut,da bini wieder:)

hend oi sicher scho gwunderet, oebi vom erdbode verschluckt worde bin, but... here I am!

ide zwuescheziit hend sich dweg vode livia und mir trennt, sie isch vor guet 5 taeg vo christchurch (suedinsle, ostkueste) uf australie ueber dueset, wahrend ich mich uf de weg ufe halbinsle oestlich vo CC gmacht ha und zwar uf de suechi nachme sog. wwoffing-platz, das isch e farm oder e famile mitme garte wo luet fuer mind e wuche ufnimmt, und ihne als gegeleitsig fuer ca 4 stund arbet pro tag ufm hof oder im garte gratis esse und es warms bettli git:) ich ha e super netts ehepaerli gfunde und am neujahrstag doerfe mit em maa (er isch notabene 70i) 120 schaf i eim tag gschore!! mini ufgab isch gsi, die frisch gschorne schaffell uszschuettle, zaemezlegge und inen container ztue, die chline teili zaeme zwuesche und chli ordnig zhalte. die schaf wieget oepppe je 70 kg und er hett die alli alei ghandlet, ich bi echt beidruckt, er hett dementsprechend au oberaerm wienen 30 jaehrige bodybuilder

ja, und da ich a dem tag oeppe 10 stund im stall gstande bin, hani gestr frei becho, ha natuerli als ersts usgschlafe,weli am end vo dem scher-tag echt uf de schnurre gsi bin und bi denn aber am 6i am morge dur es erdbebe vonre staerchi vo 5.5 uf de richterskala relativ unsanft gweckt worde. es hett giiget und kraechzt i mim zimmer und i bi also ordetli duregruettlet worde; isch mis allererste erdbebe gsi,woni erlebt ha und denn was fuer eis! dbuerin isch u lieb gsi, gad uebere cho (weli schlaf imne andere gebaudeteil, ha au mis separate badzimmer, muess dadefuer aber usse umelaufe, isch aml zimli chuel znacht) zum luege oebi "alright" bin. ich bi ehrli gseit soo verpennt gsi, dass e allfaelligi angst gar ke ziit gha hett zum ufcho, wel nach oeppe 5 sek isch de spuk au scho wiedr verbii gsi. sie hend da i dere region sit em grosse verheerende bebe letzt jahr oeppe 6000 nachbebe gha, dadevo es paar zimli starchi(das letzt nacht isch nach ihrere meinig es eher deftigs gsi).

ja, und huet hani doerfe spinnenetz ums hus wegmache, hett doch es wiili duuret, aber isch e belohing wenn dhuuswaend nacher wiedr schoen usgsend. mer hend huet ebe noed choene schaf schere, wel dschaf znass seged(dwulle muess ganz troche sii).

dmaryn, dbuerin, isch e super choechin und ich wirde da so richitg spoilt mit esse. sie macht en huufe guetzli und chueche, zum zmittag hetts mal es eiersouffle geh, denn macht sie selber gunfi oder limetta-honig, christmas cake (chil wie weihnachtsstolle, mer muess kandierti fruecht moege) ez isch sie gad am erdbeeri rueste vom garte, e ganzi schwetti hetts geh, und de duft segi oi, herrlich!

ja, und was hani mit de livia ide letzte 3 wuche so alles erlebt?

zum bispiel

-hendmr e riese robbekolonie gseh, die hoeckled alli uf de felse gad neb de hauptstrass und mer chan sie wunderbar beobachte oder

- e overnight cruise ufme boot ide fiords im suede vode suedinsle(milfordsound fuer die wo`s mal wend google), wunderschoen und slaessige a dere ganzer sach isch, dassmr eigetli die billigst version buechet gha hend und womr am desk stoend seit ois dlady det: i`m sorry, but your cruise was cancelled und mir scho denkt: neiiii, und denn seit sie im gliche satz mitme grosse smile "but you`ve been upgraded to another cruise", schlussendli simmer ufme schiff gladnet, wo statt 64 passagier nume 24 mitgna hett(sbusiness lauft aschinend da ned so uf hochtoure,sie gspueret dwirtschaftskrise zimli starch bzgl touriste) und es (halt englischs aber noed allzu schlechts) 5 gang menue becho plus es eignigs zimmer mit echte bett(nach mehrerne wuche camperbett). eimal hendmr sogar en stopp gamcht und mer hett choene mitm kayak usefahre, det hani denn au fluoreszierendi quallene endteckt, nu leider isch de schoen ablick dur es paar laestigi sandflies truebt worde, die mini-fluege hend mi naemli in schaaare agriffe und die stich biisset abartigstens, es git luet die chratzed sich so starch,dass sie die ganze bei vernarbt hend, ich hamer prophylaktisch e antihistaminika creme kauft, aber shett au scho naecht geh, woni wild mich-chratzend verwachet bin

- Dunedin, womer en super nette Anatomiestudent kenneglernt hend(mer hend en vor oeppe 4 wuche als hitch-hiker mitgna gha), hend mit ihm znachtgesse und hend oise campervan nacher doerfe ufm parkplatz vode studentegnosseschaft abstelle. es isch soo chalt gsi die nacht, dass er ois en schlafsack und e waermeflasche gschenkt hett, die sind noed ihm gsi, sondern ghoered ehemalige ustuschstudente, wo jewils es halbs jahr bi ihm ide wg wohned und denn wiedr hei goend, ergo ihri sache det loend, mir hend natuerli nuet degege gha:)).er wird wahrschindli nach frankrich ga negst fruehlig als verchauefer vo quicksilver, urspr sind nebejob, aber schint so als wuer er das als zuekuenftigs ikomme apeile... why not?

ja, ich choent unendlich viel schriebe, aber am liebste verzelli oi denn all die details under 4 oder meh auge.

ich hoff es gaht eu guet und wuermi ueber es au na so churzes "es geht mir gut"-mail vo oi freue,

un abbraccio, (=hug), Sarah