ciao meine Lieben!

sodeli, äxgüsi, dass er so lang uf de erst blog bricht hend müse warte! als ersti warnig: ich wirde uf gross- und rechtschribig kei rücksicht neh ich hoff, es isch trotzdem leserlich;)

also, wo fanged mer aa.... hmmh, sind scho wieder 2 wuche vergange sit oisere akunft in auckland. de erst abig hett scho mal guet agfange, isch denn aber chli scary z'end gange und zwar sind mer nach fast 30 stund flug (mit 2 stund schlaf) und entgegenahm vo oisem campervan uf emene mega gmüetliche camping noed wit vode stadt entfernt glandet. aschinend hetts det soz nie touriste, slebed tatsächlich nume iheimische det, entweder am wuchenend oder fix. jedefalls sind mer det mit 3 type in kontakt cho: de eint en chliwüchisge neuseeländische fernstehstar (macht bi komoedie mit), de ander en (arme) 40jährige, eric, mit spastische bewegige (wahrsch ufgrund vomne früeherige unfall, hett e riese narbe ufm hinderchopf gha) und en art surfertyp, jaja, sind denn vom eric zum znacht iglade worde, wel er eh villzvill kochet gha hett aschinend. isch sehr fein gsi, so richtig deftigs ênglischs esse mit sausage, smashed potato und frittiertem gmües. die 3 hend ois denn vill tips zum reise geh, filmli zeiget (ebe vom komedy-star) und so wiiter. mir sind nachm flug denn aber zimli uf de schnurre gsi und sind öppe am mitternacht is bett. de eric isch die ganz ziit mit ere taschelampe und zuckende bewegige (ebe weg de spastik)ufm gländ umegloffe während mir mal go zäh putze gange sind. womer denn scho öppe sitre stund am schlafe gsi sind, chlopfets plötzlich vo usse as auto und mir gsend de schii vonre taschelampe wo unruhig hi und her lüchtet. mir natürli mit em puls sofort uf HUNDERTACHZG, total in panik, wer ez am 2 am morge a oise camper chlopfet!!!! ich frög us reflex: "who is there?" da chunt e antwort: "i've found e possum".de eric. mir hend ihm ebe a dem abe gseit, mir würed gern sones tierli gseh, wo urspr vo australie nach nz importiert worde isch und ez als pest bekämpft wird, wels di iheimische flora und fauna total zerstöred... denn hendmr erst checkt, dass er sit 2 stund uf der suechi nach me opossum gsi isch für ois und ez erwartigsvoll uf ois gwartet hett, dassmr au chömed go luege. mir hett er irgendwie leid ta, dliv hett gseit, ich söll sege sie seg am schlafe, da antwortet er: "chasch ja sus efach du cho, es isch da hinder em camping im gebüsch". mag ja sii,dass ers nu guet gmeint hett, aber hami gad wienes chlises meitli gfühlt, wo vom böse maa es zeltli abote bechunnt:) ha denn gseit, ich seg vill zmüed und ha gschlafe. ich und dliv hend zitteret vor angst, hend sofort sichergstellt, dass de camper abgschlosse isch;) soviel zu oisere erste nacht in NZ. zum guete glück isch das die einzig so strub begegnig gsi...

ide zwüscheziit hend mer scho vill gseh und erlebt: mer sind ganz im norde gsi, wo sich stasmanische meer mit em pazifik verbindet, es idrücklichs spektakel, denn go sanddüne-surfe(ufme surfbrett büchlings 40 meter en steile sand hügel derab gfräset), rohe seeigel und e rohi muschle vomne maori (uriwohner vo NZ, erst sit öppe 1200 n.Chr.uf de Insle, d'Europäer sind erst 1780 da ane cho) zum probiere becho, isch na fein gsi, müssts ez aber nöd naml ha. go segle oder besser gseglet worde ine bucht, delfine gseh, tölpel (vögel, wo mit bis zu 150 kmh sich is meer stürzed zum go fische), wunderschöni vulkanlandschaft mit gelbe-stabilo-farbene see und verschiede farbene felse (blau, grüen, rötlich, orange), vill avocado gesse (werdet da züchtet), vill tier gseh(v.a. so blödi suicide-birds, wo sich immer bis zum letzte moment uf de strass ufhaltet und erst churz vor em überfahre-werde wegflüged, leider nume flachdruckti überfahrni possums, na nie es lebigs i 2 wuche, obwohls da 70 mio sött devo haa), ois amne sandstrand chöne es pool grabe wo ganz heisses thermalwasser uechunnt, vill verschiedeni lüüt kenneglernt(v.a. vill dütschi, wo ihres ganze lebe ide heimat ufgeh hend zum da es jahr lang uf farmene go fruit-picking mache und imne familie-auto lebed und schlafed;)), und so wiiter.

sodeli, meh derzue es anders mal, sus chömdr na viereggig auge über vom in bildschirm starre;)

e grossi umarmig vo oine 2 reisefüdlis Livia und Sarah

p.s: sföteli hett nüt dermit ztue, ha eifach eis müse uelade zum chöne de itrag poste, also nöd verschrecke, hihi