Hallo Zaemme us Vietnam! Mir sind scho fascht am End vo unserer Vietnam-Reis und hand viel erlaebt und gseh und freue uns au scho ufs nexte Land... Aber zerscht mol zu Vietnam:

Agfange haemmer jo in Hanoi, was e super tolli Stadt isch! Denn sind mr per Nachtzug ind Baerge vo Sa Pa gfahre, wo mr e 2-taegigs Trekking miteme eigene Guide gmacht haend. Es isch e genials Erlaebnis gsi zwuesche de Rysfaelder z laufe bi dere schoene Natur und immer wieder Fraue und Kinder vo verschiedene Bergvoelker choenne z beobachte wie sie Ihre Schmuck und die saelber gmachte Taeschene probiere z verkaufe...

Au dr Usflug zur Halong Bucht isch toll gsi... obwohl mr zerscht gschockt gsi sind wills e soooo viel Boot in dere Bucht kha het! Aber am zweite Daag sind mr fascht elleige unterwaegs gsi und haend die mystischi Stimmig mit dene Kalksteifelsene wo usem Meer empor rage choenne in volle Zueg gniesse.

Mitem Nachtzug sind mr denn nach Hue gfahre und leider bi Raege doert usgstiege... Tja, was soelle mr sage... s Waetter het irgendwie zu daem Ort passt... uns het Hue gar nit gfalle und die alti Kaiserstadt isch au nuet Bsunders gsi...

Schnaell sind mr witer nach Hoi An (au wieder per Nachtzug) und das isch richtig haerzi gsi. Dr Ort het total viel Charme und ganz viel tolli Laede, gmietlichi Kaffis und Restaurants... :)
Nichts ahnend haend mr doert denn sogar no zwei Kolleginne vo dr Angie atroffe, d Steffi und d Linda. Die sind natuerlich zerscht mol baff gsi wo sie uns gseh haend, aber spoetischtens nachem Kaffi wo mr zaemme gschluerft haen, isch denn dr erschti "Schock" ueberwunde gsi... he,he. Het Spass gmacht, mit ihne bitz z quatsche und Hoi An z gniesse...

Vo Saigon sind mr au total begeisteret. Das isch e aecht fortschrittlichi Stadt mit interessantem Hintergrund. Natuerlich sind mr doert au e Kriegs-Museum go aluege, aber das isch scho sehr happig gsi...

Per Taxi und Boot sind mr denn witers ins Mekong Delta, wo mr vor dr einte oder andere (Sproch)-Barriere gstande sind... Mir sind Zobe spot mitem Boot in Cai Be ako (waehrend dr Boots-Fahrt hets graegnet und blitzt und dr Fahrer het anschienend nit raecht gwuesst wo Cai Be isch... sehr beruhigend gsi...). Doert het er uns eifach irgendwo usglade und mir haend keeei Ahnig kha, wo mr sind... Jedefalls haemmers denn doch irgendwie ine Hotel gschafft wo sogar au no raecht akzeptabel gsi isch... d Kakerlake haemmer zum Glueck erscht am nexte Morge entdeckt... he,he.
Denn haemer am nexte Morge zum Floating Market woelle aber so wie sichs usegstellt het sind mr in Cai Be imene totale Kaff glandet wo uuuueberhaupt nit uf Touris igstellt isch. Mit Haend und Fuess haemmer denn doch e Bootsfahrer gfunde wo uns ine witere Ort brocht het...

Au zu Sa Pa haemmer bzw. Ich (Nici) e Story uf Lager... Gmietlich sind mr zwuesche de RUTSCHIGE Rysfaelder gloffe wo`s ploetzlich "pflutsch" gmacht het und d Nicole e Rysfald witer unde im Schlamm-Bad glandet isch.... mitsamt dr Kamera. Sch... !! I ha mr natuerlich nur Sorge umd Kamera gmacht, derbi hani koenne froh si dass mir nuet passiert isch... bi doch e Meter tief gflooge.
Tja, d Kamera haemmer denn in Hanoi ersetzt und hoffe jetzt, dass d Versicherig das wird ueberneh... De Foeteli isch zum Glueck nuet passiert und es wird mr immer als "unvergaesslichs Erlaebnis" in Erinnerig bliebe... :|

D Nachtzueg sind au e Abentuer fuer sich. Bis jetzt haemmer im Glueck kha und raecht komfortabli Zueg verwuetscht. D 4er-Abteil sind mitem Noetischte usgrueschtet und au raecht bequem mitsamt Decki und Kuessi. S luschtigschte isch, dass sie am Morge frueh irgendwenn luutstark vietnamesischi Musik laufe loehnd, was jedes Murmeltier ufweckt... he,he.

Unser Lieblings-Transportmittel inere Stadt isch jo dr Roller. Mit dene kunnt me eifach am schnaellschte und au fascht am guenschtigschte ans Ziel. Scho oft sind mir zwei mitsamt em Fahrer ume groetzt, zu Dritt ufeme Rolle - kei Problem :)

Ah und ufem Waeg ind Halong Bay haemmer e Roller gseh wo e Kueh (!) hinde uf bunde kha het... ohni Scherz!

Punkto Aesse koenne mr uns ueberhaupt nit beklage do. Mir haend bis jetzt nur fein gaesse und sind total begeisteret! Sogar Croissants und Paguette bekunnt me an gwuesse Ort, dr franzoesisch Ifluss losst sich nit verheimliche... Was e tolli Mischig isch.

Morn reise mr nach Cau Doc und vo doert nach Kambodscha, Pnom Penh. Ziemlich sicher waerde mr doert d Isabelle und dr Jerome traeffe und|oder mit ihne witer Richtig Siam Rep reise.

Mir freue uns sehr ufs nexte Abentuer und schicke euch e paar Sunnestrahle vo do!

Griessli
Arno & Nici