Sooo, dies Mal hei mir z checkout nid verpasst u mir si mit Robert zämä zu üsem nägschte Ziel, nämlech ufd Gili Island Trawangan. Ds isch eini vo dene drü chline Insle näbe Lombok und die geit chle under Partyinsel düre ;-). Uja so nachere Wuche ohni Meer hei mir üs natürlech um so meh gfröit zum ga schwadere hahaha.
Üses Hostel (La Boheme) het üs o gad dr Transport für ufd Insle organisiert. Mir hei je 21 CHF zahlt u das füre Shuttle vo Ubud nach Padang Bai u vo dert us ner mitem Speedboat nach Gili T. Ufem Speedboat hets o scho hönne gfägt, wüll alli ufem Deck obe chillet hei u derzue gmüetlech es Bierli tütscht hei u das natürlech zu Musig :-).
Z Hostel La Boheme chöimer gwüss empfähle, es isch öpe 2 Strasse witerhinne als d "Mainstreet", aber völlig ok, die Insle isch nämlech ä soo chlin u da het mä sehr schnell der Überblick ;-). Es het im Hostel sogar durchgehend gratis Kaffi, Pancakes u Frücht gä u das hei mir also sehr gschetzt, aber klar hei mir das o nid jede Tag chönne ässä, versteit sech ;-). Die Agstellte si o hie wieder hönne flott gsi u d Lüt wo mir kenneglernt hei alli o, grande.
Mir hei üs für je 10 Chf pro Nacht wieder eis äs Privat Zimmer gönnt u hei zersch eigentlech nume ä Wuche wölle bliebe, aber wülls uf dere Insle ä soo schön isch gsi, si mir du ner gad zwöi Wuche bliebe. Mir hei festgstellt, mir si eifach Inselchind u ja mir hei ja Zyt. :-)
Wieso mir gad ä so lang bliebe si? Ganz eifach, z Meer isch da ruhig, klar und schön hellblau u der Sand isch wiis, eifach paradiesisch. Vo dä Sunneuntergäng wei mir gar nid ersch afa rede, die si wunderschön gsi u das jede abe ->same same but different ;-). So gseit we dir Mal ä Fuess uf die Insle setzet, dörfter dr Sunsetbeach (z Fuess ca. 20 min vom Zentrum) ja nid verpasse, ja nid, die Atmosphäre dört isch eifach unbeschrieblech! Zudem si alli Lüt so entspannt u guet druffe u z einzige wo da umefahrt si Kutschene oder Velos, also ganz gemütlich.
Was krass isch d "Mainstreet" isch huere touristisch und ufgmotzt vom gröbere, 1 Beiz nachem andere häregstellt (vo dä Usländer) u chum geit mä äbä eis 2 Strasse witerhindere (dert wo o üses Hostel isch gsi), gseht als ganz anders us u mä gseht wie die Iheimische wohne und wie wenig si hei... mir hei du ner d'Locals eifach albe so unterstützt, das mir viel bi ihne si ga ässä (Streetfood) u es isch alli Mal hennä guet gsi! Für schwachi Mäge sicher nid gad z empfähle aber mir si da düre afa scho sehr abghertet ;-).
Was mir hie on the island so gmacht hei: Eat, sleep, beach, repeat - herrlech nid?
Einisch hei mir üs de doch no bewegt, näbschtem tägleche Abespaziergang zum Sunsetbeach u mir hei äs Velo gmietet fürne ganz Tag u das für 3.65 Chf. Mir si um d Insle drumum gfahre u das hätme öpe so i 1.5h erlediget, aber mir wieder, mir heis natürlech gmüetlech gno :-). Unterwägs hei mir ä agnähme Pool gfunde u si dört gad bliebe hange hihihihi.
Iz Yoga hei mirs eis ono versuecht... ja versuecht, ihr heit richtig gläsä haha. Mir si am 07:00 Uhr ufgstande u si topmotiviert zum Yoga Place häre gloffe uner isch eifach d Stund nid gsi wägem Ramadan. Das gits ja nid, das isch dämfall gad äs Zeiche für üs gsi, das das Yoga älwä nüt isch für üs :-).
Hie uf der Insel si nämlech alli Muslime u i dere Zyt wo mir si dert gsi, si sie gad ir zwöite Hälfti vo ihrem Ramadans-Monet gsi. D Partys am Abe si wägä däm o geng am 00:00 Uhr fertig gsi, aber das het üs gar nid gstört, de geit mä nämlech o eis ga liege. Derzue si mir erläch gseit iz o eher d Safttrinker worde...Mir wärde vernünftiger u vernünftiger ;-).
Würk top die Insel!
If you never go, you'll never know...