Dschungel!
Es isch eis Highlight nach em andere cho. Nach de Iguassufaell hend mer ues uf de Weg in Dschungel gmacht, natuerlich vo obe bis unne usgruestet mit em schwiizer Sackmesser (danke Andi) und em Moskitospray. Die erste paar Taeg hemmer im Dschungel uebernachtet. Vor de Huustuere isch die schoen Flusslandschaft gsi, was am Abig millione vo Insekte azoge het, unteranderem au Moskitos, wo de Ruego regelrecht ueberfall hend...grrr...er het scho am erste Abig ueber 70 Stich gha und das mit Moskitospray und lange Chleider. DManu het de erst schoen Sunneuntergang am Fluss prompt verpasst, will sie im Zimmer igsperrt gsi isch und uf Rettig gwartet het :( Sabsolute Highlight sind natuerlich dPiranhas gsi. Mit enere Bambusruete und mitemene Hagge mit Rindfleisch dra isch es denn mit em Boetli Fluss abwaerts gange zum Prianha fische. Nebem Fische hend mer die wunderschoeni Landschaft gnosse und dTierwelt beobachtet, unter anderem hend mer Tucane, Papageie, Affe, Kaimane, Guerteltier, Ameisibaer...gseh. DPiranha hend uf sich warte lah oder sie sind vegetarier gsi...de Ruego het sich scho ueberleit, wie ner zu Dynamit chund, damit er denn doch no en Fisch zum zNacht uf em Teller het...Aber schlussendlich mit vill Geduld hets denn doch no klappet und dPiranhas hend abisse. Eigentlich sinds gar ned so wuesti Fisch, aber wenn mer Zaeh gseht, denn wirds eim scho chli andersch. Euse Guide het eus zeigt wieviel Chraft und wie scharfi Zaeh die hend...es Bambusrohr isch keis Problem gsi abenand sbisse. Streichle muesch sie also ned welle, sust isch de Finger denn weg.
Nach vier Taeg Dschungel sind mer wiiter nach Bonito und Bonito isch au wuerklich Bonito gsi. S´chline gmuetliche Doerfli isch de Usgangspunkt fuer verschiedeni Toure zmache. Am erste Tag hend mer eus es Velo gmietet und sind zum Fluss echli go baedele. Unterwegs hend mer en Ameisibaer gseh und ueberall flueged Papageie, Aras und Tucans ume...es isch eifach paradiesisch. S´Highlight vo Bonito isch jedoch dFluss-Schnorchel-Tour gsi, da lasch dich eifach zwei kilometer lang im kristallklare Wasser lah tribe und riese Fisch schwimmed uf dich zueh...isch scho chli unheimlich gsi...aber no unheimlicher isch, isch wenn mer zerst en Caiman (en Art Krokodil) und nacher no annere riese Anakonda verbi schwimmt. Doch vo wilde Schlange ned gnueg...wo mer spoeter dNaester vo de Aras a glueget hend, isch en 2m Klapperschlange zmitzt uf em Weg glege...mir hend erst realisiert, wie gfoehrlich die Schlange isch, wo uese Guide fast usgflippt isch und mega schiss gha het...En Hoehli hend mer au no besichtigt, jedoch isch nebe all dene Tier-Highlight de Usflug recht untergange.
Momentan sind mer scho in Sao Paulo. Scho bim Aflug het ues de Schock troffe...die Stadt isch eifach riesig (19 Millione), da chann New York gad ipacke. Mir wohned bi Kollege wo mer in Fiji kenneglernt hend und da sie momentan gad uf Arbeissuechi sind, hend sie zimli vill Ziit zum eus dStadt zeige. Sie hend fuer eus es Mammutprogramm zaemegstellt, wie Familie kennelerne, Sama-Usgang, Konzertli, Fuessballmatch (Stadion 80´000), Fuessball musum, Favelas...
En alte Kolleg vom Ruego sim Papa, de Beat, hend mer au no troffe. Er isch Lehrer a de Schwiiz-brasilianische Schuel in Sao Paulo. Mit ihm sind mer Cervelats und Wiiswuerst go esse...:) endli wieder emal en Cervelat. Au die gross Schuel het er ues no zeigt...
Mir hend denn no es paar Filmli ufeglade :)
Liebi Gruessli
Manu & Ruego