So mir si für 90$ (inkl. Gepäck) mit der Island Air vo Honolulu nach Kahului (Maui) gfloge, z Ganze isch nume 40min gange u das imene chline härzige Flugzüg. Mir hei üs eigentlech im Aloha Hostel in Paia wölle niederlah, aber z einzige Hostel wo no isch frei gsi, isch z Banana Bungalow Hostel in Wailuku gsi. Mir hei halt chle z spät gluegt, aber mir si so :-). Mir hei dert ner 8 Nächt buechet uds Hostel isch so ei*****masse Ok gsi, d Lüt si rächt vermüpfti gsi inkl. dä Agstellte, aber mä het derfür Gratistoure chönne mache, darum ischs gwüss Ok gsi. Die erste 3 Täg hets grägnet und das in Ströme, mir si somit chli ga shoppe u sogar im Kino gsi. Mir kenne üs iz also Bestens us ir Maui Shoppingsszene ;-). Vom Queen Ka'ahumanu Center (Kahului) bis zur Whalers Village (Kaanapali). A dä andere Täg isches zum Glück bombe Wätter gsi u mr hei doch no so einiges chönne unternäh: - Road to Hana Mir hei ä Tagesusflug mitem Hostel gmacht u das die wunderschöni Nordküste ab. D Strecki isch insgesamt 103 km läng u rächt kurverich u das vo Kahului bis nach Hana. Unterwegs chame viel tolli Sache mache, mir hei dr Bamboo Forest gmacht u si dert über Stock u Stei zu zwöine Wasserfäll gloffe, hei in Keanae bir Aunty Sandy's z beste Bananebrot ever gässä, si im Waianapanapa State Park a Black Sand Beach und am Schluss in Hana si mir no a Red Sand Beach. Alles Top gsi, es hät natürlech no viu meh Sache ka, aber es längt halt nid geng für alles. D road to Hana darfmä sich uf ke Fall la entgah we mä in Maui isch. :-) - Beach hopping ar Südküste Mir hei im Hostel d'Cami ud Nath kenneglernt u hei mit Ihne mitem Outo dörfe mitfahre, mir si der ganz Tag unterwegs gsi u hei d Stränd ar Südküste gmacht. Dr Big Beach ganz im Süde het üs am beschte gfalle, näbe dran hets ono dr Little Beach u das isch ä inoffizielle FKK Strand, haha sehr amüsant gsi das eis z gseh, mir hei aber wieder umkehrt, wüll dert nur die elteri Generation verträte isch gsi. ;-) Mir hei när no 2 Stops meh gmacht und am Schluss z Sunset am Kamaole Beach in Kihei gluegt. - Lahaina & Kaanapali Beach Mir si a die zwöi Orte jewils mitem Bus gange, hei geng öpe ä Stund ka, aber voll easy gsi, Bustagescharte het nur 4$ koschtet. Es isch also o ohni Outo müglech, aber mit Outo wärs natürlech viel gmüetlecher u schneller, aber ja, nägscht Mal de ;-) Lahaina isch äs härzigs Fischerdörfli ar Westküste vo Maui u rächt gmüetlech, dert hei mir im Cool Cats Cafe ä Burger gässä u das isch emfall der Best Burger gsi wo mir bis iz hei gässä! Würklech der absolut Wahnsinn! Kaanapali Beach isch o ar Westküste, ca. 10 min vo Lahaina entfehrnt und isch o ä henne schöne Strand, dert ischs halt rächt touristisch wüll dert d' Hotelalage ud Whailers Village isch, aber äs het super Sunsets! D' Vulkantour (Haleakala) hei mir leider nid chönne mache wäge schlechtem Wätter, aber o hie, hei mir nume guets kört! Maui isch eifach genial, die Landschafte u alles eifach WOW und äs het für jede öpis z biete :-)