Mittlweriilä bini im Härzä vodr Nordinsle acho- in Taupo. Aber aues ar reihe nache.
dRoute vo hü tisch xi:
Rotorua-> Wai O Tapu -> Huka Falls -> Taupo
Ca. 45min. vo Rotorua isch min ersti Stop xi, im Wai O Tapu Natur Reserve. Das isch dr grösti Thermal Park. Ig bi ganz früeh am morge det acho, und drum praktisch allei xi im Park, suuupiii.
Mä isch hie näb töifä Kraterlöcher, blubbernde Schlammtümplä und röichländä Löcher dürägloffä natürläch immer mit däm penetrantä Gruch vo fuulä Eier ir Nase Wenn ig de das sogar scho schmöckä de isches de würkli heftig!!!!. Z'spannendste isch sicher dr Champagne Pool. E Quelle wo 65m töif isch und e Temperatur het vo 74C. Dür das, dases im Wasser Gold, Silber, Arsen, Quecksilber, Schwefel und Antimon het, isch dr Rand vor Quelle lüchtig orange/rot. Xeht ganz geil us. Ig bi de gmüätläch dr ganz Park abgloffä. Hetmi definitiv no beiidruckender dünkt aus Te Puia gester.

Wiiter isches gange richtig süüde. Ufm Wäg det ane si de no dHuka Falls xi. I mim Reisefüährer isch gschriibe xi, das sigi eini vo de schönstä Sehenswürdigkeite ufdr Nordinsle. Auso hani det ja müässä haltä. Jooo….äs isch würkli ä schönä- extrem töif blauä Wasserfall. Es paar fotis gmacht u wiiter…
Dr räschte vom Tag hani de in Taupo vrbrocht. Das isch rächt e cooli stadt diräkt am See- Lake Taupo- ringsumä mit Hüglä, vilfach Vulkän. Isch halt eifach zimli Touristisch.

Gschlafe hani die Nacht „uf dr" Reids Farm. Das isch dr gröschti Freedom Campingground uf dr Nordinsle- oder sogar NZ?! Das heisst du muesch det nüt zahle. Chasch eifach härä, parkiere und det schlafä. Ig hamer de det es Plätzli gsuechtu mi iigrichtet. Plötzläch isch e Camper näbä dra gfahre u het mi gfragt obs ok sigi wenn sie 2 näbä mir Parkieri. Chum heisi parkiert gha isch är ouscho zuemer cho u hetmr es Bierli bracht Isch uscho dases 2 Dütschi si(Gerhard & Margrit) und sit 2Mt hie am reise si. Mir hei de no zimli lang Gschichtli uustuscht u si de druf cho dasmer morn a gliich Ort wei ga wandere. Mau luege…vilicht xehmris ja de wider irgendwo!