MILFORD SOUND
Ig ha für schön Wättär bättät. Würkläch! Woni ufgstange bi hez nid auzu schlächt usgseh, und ig ha afa hoffä. Am 10:00 hani de in Milford Sound „müässä" si. Ig ha ä Bootstour buechet gha düre Milford Sound. Us däm Grund bini de dr letscht biz vor strecki ou eifach dürägfahre ohni Stopp. Ufe Homer Tunnel bini rächt gspannt xi. Überall isch über dä gschribe worde, mä hätt chönne meine was fürne Tunnel das isch. Är sigi extrem schmal, steil, dunkle etc. Är isch gad mau 1,2km läng….nid extrem steil, 1 Spuurig und ok, ja. Verdammt dunkel. Ha chli müässä schmunzlä chömät mau id schwiiz mini liebe …..dFahrt isch aber verdammt (exgüse) mega schön xi. Riisä Bärgä und überall (wüws letscht nacht so gschiffät het) si Wasserfäll ach echo.
In Milford Sound achohani de ufs Schiff iicheckt und punkt 10:30 simer „in See gstochä" ufd Nature Cruise. Es isch WWOOOOWWW xi. Dr Mitre Peak isch leider chli ide Wulche xi. Mit 1'682m ischer dr höchsti Bärg vor Wäut wo diräkt usm Ozean ragt. Wunderschön. Super si ou dFairy Falls xi. Tämporäri Wasserfäll wome ä Rägäbogä drinnä het xeh. Es het immer meh uftoh und dr ganz himmel isch fasch blau xi. Wie geil isch das?! Es Rägnät hie a 200 Täg im Joohr. Wenns hie 5 Täg lang nid rägnät de isch das ä exremi trockä Periodä. Und ig ha eine vo denä Täg verwütscht.
Wüws aber so viel rägnät, und so viel Wasserfäll het, hetz obe ufem Salzwasser, immer ä 2-3m Schicht Süesswasser. Wüws letscht Nacht so viel grägnet het, isch die Schicht hüt 7m „dick" xi. Krass oder?! Ha no nie so öpis ghört. zWasser isch o ganz grüän xi. So sigi aber nur dSüesswasserschicht. Wemä när iz Salzwasser abe chömi de sigi zWasser ganz klar und blau.
Fasch am Schluss vo üsere Bootstour simer de no ine Wasserfall ine gfahre. Krass wie eim das ghuddlät het
Zrügg im Stedtli hani de no ä moment zPanorama gnosse und hami de irgendwenn ganz gmüätläch ufä 170km längi Rückweg gmacht. Es si def. Die schönstä 170km xi woni jemals gfahre bi. A jedem Egge hetz ä Wasserfall oder ä See gha. Mä isch dür Schluchte umringt vo Bärgä und Rägäwald gfahre.
Im Lonley Planet hani de gläsädases e Wanderig ufe „Key Summit" git (isch ou dr Afang vom bekannte mehrtägigä Routeburn Track).Vo det heigmä ä spektakuläri Ussicht. Bi scho überzüügt xi & somit losmarschiert.Und wider einisch isches Bärg ufä gange…. ) Deja Vù! Läck bobi, mini Oberschänkel hei um hilf gfleht (die cheibä hei gäng no weh ta vor angere Wanderig). Nach 2h ufä louffä bini de acho. *spring-hüpf-heul-jauchz-vor-mega-fröid* Botz verreckt das Panorama!!! Ringsumä Bärgä!Cindy=HAPPYYY!Nid nur das, det obä zoberst uf däm Bärg hetz ouno ä Moorlandschaft gha mitemne Seeli, wosech dBärgä drinne gspieglet hei. Ober affe geil! (Sorry Lüüt weni hie scho wider so schwärmä. Aber es isch würkli ungloubläch xi )
Nachdem ig das Panorma „ufgsugt" ha gha isches des wider dr ganz wäg zrügg abä gangä ;o)
Ufem Rückwäg mitem Outo nach TeAnau hani de no bim Mirror Lake gstoppt. Det hetsech aber nid würkli viel gspieglet und mä isch regelrächt ufgfrässä worde vode berüähmt berüchtigtä Sandflies.
Ungerwägs no X-mal gstoppt wüw dKulisse wahnsinn isch xi, hanis de doch no irgendwenn zrügg nach TeAnau gschafft
Völlig erschöpft vo au denä iidrück gniässä iz hie no mis Bierli…….

„Travelling is NOT a piece of cake!!!!"